........ ياللى انت أُمك بين إديك ............
فاتت سنه أقصد سنين ومشوفتهاش
عشت السنين وأنا جنبها ومشوفتهاش
كانت بصوتها بتتوزن
وقت المرض معرفتهاش
كنت الضنى كنت الأمل
لاعرفت أكون إبن ووفى
حتى الأمل مرجعلهاش
الكل فينا كان بيسلك سكته
أخده الزمن جوه الغياهب
والكل فينا مسمعلهاش
وهى زى ماشوفتها جالها الغنى
عن كل شىء إلا الأمل
إن بيوم تشوف ضناها وتحضنه
بس القدر حكــم الزمن
قفل الطريق من سكته ولاشوفتهاش
أما الحقيقه إن الهوى كان سرنا
قلبى معلق قلبها وبيفهمه من صمتنا
كنت بحس بحضنها رغم الفراق
كانت أديا تضمها وبإشتياق
وكنت أحلم إنها قاعده تنادينى
وأنا بداعب شعرها بحتة قماش
واقول يا أمى ياجنتى وجاتنى ببلاش
كنت الصديق والإبن وقت الملتقى
لما تشوفنى بحضنها
كانت تطبطب بالحنان
وتضمنى على صدرها
إنت ياواد
بقيت كبير وفرحتى بيك ع المعاش
وكنت أضحك لها
يامايا لسه
بصحتى أما النصيب لسه مجاش
أحوال كتير بحلم بها
والقلب تعبان م الفراق مشتاق لها
مشتاق لكلمة منها
مشتاق لضمه بحضنها
حتى لشتمه منها
إنت يازفت الفجر أذن
وإنت لسه ملفوف بالقماش
ماتقوم وتعبد ربنا
بكرة الزمن هيفوت عليك
والسجده لسه مطولتهاش
وأنا النهارده بقولها
عدى الزمن من يوم مماتك
والفرحه بعدك إنتهت ومنولتهاش
ياللى إنت أمك بين إديك
إجعلها تاج ومترمهاش
إوعى الشيطان يضخك عليك
وتفوق بساعه متلقهاش
دا الجنه هى ورجلها
بوسها يوماتى متنسهاش
فاتت سنه أقصد سنين ومشوفتهاش
...................... احمدعامر ......................
ننوه ان ماينشر حق مسجل بالهيئات المنوطه بذلك 3151410/2017 س م ب
ليست هناك تعليقات:
إرسال تعليق