.............. وقت البـــــــــــلايا .................
وقت البلايا والمحن تعرف اصول الناس
واللى يحبك اوى عارف تمام مهــــــــــــــرك
ولاعاوزه الفهلوه ولا حتى الاحساس
اما اللى كرهك اوى بيشوشر على طهــــــرك
الكل ظاهر وواضح لا ظن ولا وسواس
ابن الاصول واقف وساند بالزمن ضهــــــرك
وابن الحرام يتركك ويرمى بوشك كاس
وتحس انه بيشمت لو الزمن قهـــــــــــــــرك
كون الاسد وقت البلا واحفظ عهود الناس
واياك تنخ للخسيس ينكسر ضهـــــــــــــــرك
ولو الزمن خلاك بعد العز فقير وتنداس
افضل عزيز النفس ليوم دخول قـــــــــــبرك
واللى بيصبر ينول مهما يكون حساس
ولو الزمن جففك بكره يتملا نهــــــــــــــرك
واما الاله بالسما مالك قلوب الناس
ويمكن يكون اختبار ربك يختبر صــــــبرك
الله اكبر لما الزمن يقسى وتحتاس
باديه يزيل الهموم ويغير بالدعاء كــــــــربك
ياعم ياللى الدنيا قست عليك بالباس
وانت الاصيل بس الزمن كســـــــــــــــــرك
بكره الزمن يعززك وتبقى سيد الناس
بس التزم واجعل م الزمن صـــــــــــــــبرك
واضحك واحمد ربك واشكره ولا تحتاس
هو اللى جابر خواطر واظهر للاله شكــرك
يتبدل الحال من قهوجى او بائع اكياس
لملك ماتحصيه ويعلا بين العباد ذكــــــــرك
واللى بيرمى حموله لله ومايشتكى للناس
يفضل عزيز المحيا ويزيد الزمن قــــــدرك
ويبقى فارس وخيال وعنده شده وباس
تهابه الاسود بالجبال وعزمك سند ضــهرك
وقت البلايا والمحن تعرف اصول الناس
واللى يحبك اوى عارف تمام مهــــــــــرك
................ احمد عامر ..................
ننوه ان كل ماينشر حق فكرى مسجل بالهيئات المنوطه بذلك
