............ وانا لسه بحلم ...................
انا لما اشوفك ببتسم
وبفتكر ايام زمان
وبشوف ملامحك تترسم
لويوم تجينى بالمنام
يدخل على قلبى الدفى
وكأنه طيف جاى بالوفى
وتحسنى من غير كلام
واما بتوه بتضمنى
والقى ايديك بتشدنى
بحس انى بتقسم
مابين حقيقه اوخيال
بس اما اشوفك ببتسم
*********
مرت سنين توهنا سنين
بس الحنين بيضمنا
قلبى الحزين يشكى لمين
وايه يعوض بعدنا
دنا قلبى عاش
على حلم فات.اوذكريات
بقت ساعات .
خدت سنين من عمرنا
وانا لسه عاشق بسمتك
فوق الشفايف تترسم
ولسه بحلم وانتظر
انك تمر ف حلمنا
وانا لما اشوفك ببتسم
**********
وانا لسه بحلم
والله اعـــــــلم
من اد ايه عمرى انتهى
من يوم ماشوفتك
وانا قلبي رايدك
وحلمى بيك من وقتها
فاتت سنين
وانا لسه قلبى بيناديك
زاد الحنين
ونفسى اكون مابين اديك
والعمر راح او انتهى
ولسه بحلم
بالزمن وايام زمان
ولسه نفسى
بتشتهى نفس المكان
واشوف ملامحك تترسم
اويوم تجينى بالمنام
وانا لما اشوفك هبتسم
وانا لسه بحلم
............... احمدعامر ....................
ننوه ان ماينشر حق مسجل بالهيئات المنوطه بذلك 139701/2018 س م ب
ليست هناك تعليقات:
إرسال تعليق