.......... بوسط الطين بتدفنى ...........
وتاهت السنين منى
وزاد بالسنين ســــــــــــــنى
ولسه القلب متحير
وده لانى اكمــــــــــــــــــنى
عشقت الوهم كتير ياما
وتاه بالهوى حلـــــــــــــــمى
واهو يعنى بحس ساعات
بان الحلم كلمــــــــــــــــنى
وقالى ياعم ارحمنى
مدوخنى مجـــــــــــــــــننى
لا حيلتك مال وتتعايق
ولا مبطل تغازلـــــــــــــــنى
ولا حيلتك دماغ فايق
عشان تبدأ تحايلــــــــــــنى
ومره تحطنى براسك
وطول الوقت تهملــــــــــنى
وبتفكر كتير بيا
ولا مره تجاملـــــــــــــــنى
وتتحرك تقول هعمل
ولامره بتعملــــــــــــــــنى
واضحك من كلامه كتير
تاخدنى الفكره وتشلـــــنى
واقوله ياحلمى بتتريق
ماكل الناس بتهملــــــــنى
وانت حلم وبسيط جدا
ولا فيه حد يساعــــــــدنى
وكله وعود ع الفاضى
ويجى كتير يراوضــــــــــنى
وانت حلم اكون انسان
ولا مره بيوم اتهــــــان
والقى البيه يســــــــاندنى
واكون بالجوع نفر شبعان
يمد اديه وينجــــــــــــدنى
ووقت الضيق الاقى ايد
وبتطبطب وتكــــــــــــرمنى
وماشوفش ولا انسان
ومتعرى بليل ماطر ويفقدنى
معانى العزه والقيمه
ويجى ببرده يطــــــــردنى
والقى دموع على خده
واحس بنفسى بتهيـــــنى
ويتبسملى حلمى اوام
ويندهنى يكلمــــــــــــنى
انا حلمك بعيد جدا
وفيه غيرك يساومـــــــنى
ولو واحد يحققنى
كتير جدا بيهملـــــــــــنى
ياعم فوق دا فيه عالم
بوسط الطين بتدفــــــنى
.............. احمد عامر ..............
ننوه ان كل ماينشر حق فكرى مسجل بالهيئات المنوطه بذلك 52104501/2015
