الثلاثاء، 8 مايو 2018
الاثنين، 7 مايو 2018
استر يارب الكون للشاعر احمدعامر
.............. استر يارب الكون .............
هنام وانا صاحى
واصحى وانا نايم
ماهى الحياة انواع
والخلق مش دايم
صبحت سنيه جمال
وجمال بقى هانم
واهو يعنى نعمل ايه
بفطر وانا صايم
واحلم بإنى حديد
وبالبحار عايم
مع انى كنت وحيد
وحلفت منا قايم
صبح الصباح بالليل
وبالنهار نايم
بقت الحياة مقلوبه
سبحانه الدايم
بقى الفساد عنوان
اما الصلاح عايم
وان كنت يوم انسان
إوعاك تكون لايم
ع اللى حصل للكون
حكم الفساد دايم
اسجد لرب الكون
ادعى على الوايم
يارب انا مجنون
بحلم وانا نايم
واصحى بطن هموم
القى الامين خاين
أبكى وانا مغموم
القى الغريب صاين
اما القريب معتوة
بالزنقه مش عاين
استر يارب الكون
اصل السواد باين
وهنام وانا صاحى
واصحى وانا نايم
................ احمدعامر ..................
ننوه ان ماينشر حق مسجل بالهيئات المنوطه بذلك 65041/2018 س م ب
الأحد، 6 مايو 2018
ايوا حًبك للشاعر احمدعامر
............. أيوا حًبك ............
عمر عينى
ف يوم ماغابت
عن عيونك
حتى لما ف يوم تنام
يتقفل بيها جفونك
لأ وكلمه ياحبيبي
هى ديما من شئونك
كلمه صعب نقولها تانى
لما أكون عايش بدونك
🌹أيوا حًبك
لما كل دمى حبك
واما روحى
بالمنام ناطقه اسمك
واما بحلم
كل لحظه بقلبى رسمك
واما بتعب
يتنقش قلبى بجسمك
وانتى ديما تحضنينى
🌹
خلى كله بيوم يلوم
الملامه للضعاف
واللى نايم كل يوم
اخرته تحت اللحاف
اما حبك لىً دوم
أحلى رد ع الخفاف
وانا دمى جوة دمك
أه بحبك مش بخاف
.🌹
🌹
وإنتى حُبك لىً معنى
شوق وغنوة بأحلى مغنى
لما بسمع بس صوتك
بنلاقيها تزيل دموعنا
واما احس بالسعاده
يبقى يوم فيه إجمعنا
أيوا حُبك كل حاجه
مهما قولنا أو سمعنا
.............. احمدعامر .................
ننوة ان ماينشر حق مسجل بالهيئات المنوطه بذلك 1380/2018 س م ب
السبت، 5 مايو 2018
وبينكتب لينا القدر للشاعر احمدعامر
............. وبينكتب لينا القدر ....................
وبينكتب لينا القدر
ونلوم على فعل الزمن
فينا اللى عاش واللى خسر
وقليل أوى اللى فطن
إن الحياة طوق بنكسر
وكتير بيملاها العطن
والحب مره بيتنشر
وكتير أوى ملهوش وطن
وإحنا الحيارى وقلبنا
مابيروهوش كتر المطر
يمكن بحس إنه إنكسر
مع إنى بأمن بالقدر
بس النفوس فيها العجب
نسايه لما بتتحضن
إصنع لقلبك 100 ميزان
وإجعل لروحك 100 أنا
يمكن تعيشها 100 سنه
أو تنتهى قبل الأوان
دا الحب كلمه بتتسطر
لما القلوب تصبح وطن
فيه الزهور بتزينه
وتنوره لو تتحضن
والحب كلمه أو أثر
بيزينوا اللى إتعطن
واما الكبار باعوا الأثار
صبح الصغار حبة حجر
وقلوبنا سلعه بالديار
بيتاجروا بيها الغجر
فجأه القلوب ملهاش أمان
صبح النهار ملناش وطن
أصل الوطن حبة حنان
لو ينتهوا مات الوطن
................... احمدعامر ................
ننوه أن ماينشر حق مسجل بالهيئات المنوطه بذلك 50018/2018 س م ب
الاشتراك في:
الرسائل (Atom)